ang bawat tao'y may angking kasarinlan,
mag isang iniluwal sa sangkaliwanagan;
mag isang responsable sa buhay na tangan,
mag isa ring papanaw tungo sa karimlan.
ngunit bawat tanong ay mayroong sagot,
mga karamdaman na may lunas at gamot;
may aliw at sigla sa mga nababagot,
may kapayapaang bukas ang mga sigalot.
pag ako ay may sakit, ikaw ang nakaratay,
pag tanggap ko ng haplit, sa 'yo lumalatay;
pag ako ay malungkot ikaw ang nalulumbay,
pag buhay ko'y napatid, ikaw ang namamatay.
sa bawat hikbi ko'y ikaw ang lumuluha,
sa pagkahulog ko'y ikaw ang natutumba.
pag ako'y nagkamali, inaako mo ang sala,
dapat na paghihirap ko'y ikaw ang nagdurusa.
kapag masaya ka'y akin ang kaligayahan,
kapag nagtagumpay akin ang karangalan;
mga pagsisikap mo'y sa akin ang pakinabang,
ako ang nag aani ng tinanim mong puhunan.
sa aking palagay wala ng tatamis,
sa isang samahang salamin ang kawangis;
magkatugma sa tuwinang anino ang kaparis,
SA AKING PAGTULOG, MATA MO ANG NAKAPIKIT!
