buhay ng tao'y ano ba ang sukdulan?
bawat landas na tahaki'y ano ang patutunguhan?
lahat ng paglalakbay, ano ba ang hangganan?
'di ba't matatapos ang lahat sa kamatayan?
matatalim na kidlat, liwanag sa aking mata;
dumadagundong na kulog ay malamyos na musika.
nagngangalit na apoy, hatid sa akin ay sigla;
malakas na lindol, ugoy ng duyan ang dala.
katuyutan ang alindog ng isang disyerto,
ang sa dagat ay alon na nag aalimpuyo;
nakaaaliw masdan ang rumaragasang bagyo,
paglinis ng sangkatauhan layunin ng delubyo.
may kikinang pa ba sa dilim ng gabi?
may tatamis pa ba sa luha at hikbi?
may sasarap pa bang damdamin ang hapdi?
may sasaya pa ba sa pagkaduhagi?
