madalas na sagisag panlaban sa dilim,

tanglaw na ilaw sa binyag, sa kasal, sa libing,

dekorasyon sa altar, sa patio, sa hardin,

iba't ibang kulay, laki, hugis at dating.

bagama't anuman ang haba at ganda,

walang silbi ito habang buo pa sya,

magigigng makabuluhan lamang at magiging dakila

kung sarili'y iaaalay at mauupos na.

ang buhay ng tao ay parang kandila,

apoy ang nagmomolde, pagsubok ang naghahasa;

matunaw man o maubos, may maiiwang tanda,

liwanag na naibahagi'y sa sariling buhay nagmula!

aliw ka ng tao sa tagumpay at kasiyahan,

ngunit ika'y panglunod din ng pighati't kabiguan.

tulong sa paglimot ng mga kalungkutan,

pampasigla ng damdaming nagaagam-agam.

lambanog, tuba, sakau, basi at sake,

serbesa, gin, mompo at sadique,

rhum, red wine, white wine, bourbon at whiskey,

vodka, tequila, cognac, champagne at brandy.

ang buhay ng tao ay parang isang alak

habang tumatagal, lalong sumasarap;

kapag tama sa timpla ay nakakaaliw,

pag sumobra't nalasing ay nakakabaliw!

isip ko ay naglalakbay sa kalawakan;

may kometa, may planeta, may bulalakaw, may buwan.

ngunit lubos akong naakit ng kaniyang kagandahan,

bituing marilag aking tinitigan.

ang mga bitui'y may sariling liwanag,

na paalala sa tao'y kalakasan at tatag,

malayo mang abutin, may tanaw na sinag

dulot ay pag-asa sa bawat pusong hungkag.

ang buhay ng tao ay parang isang bituin,

pag may lambong na ulap ay lumalabo, dumidilim;

ngunit pagkatapos ng unos ay kumikinang, nagniningning

ilaw ng tagumpay, tanglaw ng pag-ibig!

sa pagmamasid ko sa aking kapaligiran,

maraming kulisap aking napagmasdan.

kung sipag at pagkakaisa ugali ng mga langgam,

mga putakte'y larawan ng tatag at tapang.

tahanan ng langaw basurang nakasusulasok,

madilim na kanal, tirahan ng lamok;

samantalang ang matiyaga, masikap na uod

nagiging paru-parong maganda't kalugod-lugod.

ang buhay ng tao ay parang isang insekto;

ilaw at liwanag ang basehan nito.

nasusunog sa init ang palalong gamu-gamo,

pakumbabang alitaptap, dagitab ng mundo!

maraming bahagi ang isang sasakyan;

upang gumalaw, tumakbo, umandar sa daan.

bawat parte nito'y may kahalagahan

para makarating ng maayos sa patutunguhan.

gulong ay nakasayad sa lupa, semento o bakal;

pagpapakumbaba ang dulot niyang aral.

bigat ng sasakyan sa kanya nakasalalay,

pagiging responsable ang payo nyang taglay.

ang buhay ng tao ay parang isang gulong,

kailangang umikot para makasulong.

pag nasa ilalim ka'y magsikap umahon,

pag nasa ibabaw nama'y magpursiging makatulong!

malinis na papel aking nadumihan,

upang maisiwalat ang laman ng isipan.

maaaring tula, kwento o larawan,

ang magbibigay buhay ay ang lapis na tangan.

lapis ay sinusugatan para mapatulis ang dulo,

sinasakal ng daliri, idinidiin sa puwesto;

pagsubok sa buhay bigay na aral nito,

na kailangang tasahan para mapanuto.

ang buhay ng tao ay parang isang lapis,

may kasamang pambura sa dulo ng kabilang panig;

hindi tayo perpekto, may kahinaang tambis,

ngunit naiitama ng dakilang pag-ibig!

mga hugis ng bagay ay may aral na dala,

kagaya ng krus na madalas makita;

kapag ika'y naglalakbay, may kanto ang kalsada;

at sa katawan ng tao pag ikaw ay nakadipa.

sa krus na kalsada'y kalayaan ang bigay,

sarili mong desisyon ang magiging gabay;

sa pakikisalamuha, sa pagtahak ng buhay,

isang landas ay kabiguan, sa kabila ay tagumpay.

ang buhay ng tao ay parang isang krus.

palaging may hapis, may pagsubok, may unos;

kapag nalampasa'y may tuwa pagkatapos,

at paglasap ng tagumpay ay luwalhating lubos!

matibay ang tindig, matikas ang tayo

ulap ay abot-kamay ng iyong pagsuyo;

tahanang payapa ng hayop, ibon at puno,

inspirasyon ka ng matatag kong puso.

ang liwanag mong taglay ay hiram sa araw,

katulad ng buhay kong habilin ng Maykapal;

pagpapakumbaba ang hatid mong aral,

at kapayapaang sagot sa aking dasal.

sa lalim ng karimlan, ikaw ay nagniningning,

nagsisilbing tanglaw sa gitna ng dilim;

matayog na pangarap, mukha mo ay abutin,

aliw ang dulot mo sa siphayong damdamin.

himig ng agos mo'y malamyos na awit

dantay ng katawa'y kapayapaan ang hatid;

patuloy na pagdaloy, pag-asang walang patid,

sagot sa pagsubok at pasanin naring dibdib.

rumaragasang alon doon sa batuhan,

ang kapara ay sigla at lakas ng katawan;

halik ng agos mo sa dalampasigan,

paalala sa aki'y matamis na ulayawan.

salamat, salamat mga kaibigan,

sa tatag mo bundok, sa liwanag mo buwan,

sa kislap ng bituin sa kalawakan,

at sa inspirasyong dulot ng talon at karagatan.

woke up. call. exit. drive.

travel. buy. rainbow. arrive.

beach. ocean. swim. dive.

friends. sounds. cards. alive.

mountains. road. four by four.

bathroom. clothes. eat. third floor.

chat. computer. office. store.

tv. radio. text. miss. bore.

moon. star. night. deep.

pen. paper. keyboard. clip.

airport. trash. baggage. lift.

room. enter. call. sleep.

komedya o trahedya, madamdaming mga kataga,

may aliw-iw, may ritmo, may sukat, may tugma;

isang pisngi ng sining, sinulat ng makata,

bukal ng inspirasyon, ang tawag ay isang tula.

mga himig ng notang may tamis, may pait

lirikong maalindog sa puso ko'y umaakit;

akda ng musikero, sa tagumpay niya't sakit,

ang nabuong obra'y makapangyarihang awit.

pugad sa mga ibon, sa kabayo ay kural,

tanggulan at moog ng mga sundalo at kawal,

mga gusaling pinagyaman ng karpinterong panday,

silungan, tirahan, tahanan, bahay.

ginupit, ginatgat, tinabas ang tela,

upang maiangkop sa yari, sukat at moda;

pinagyaman ng sastre sa kaniyang makina,

saplot ng katawan, magarang damit ang bunga.

ang lahat ng bagay ay sa D'yos nagmula,

ngunit inaasahan Nyang tao ang magpapala;

katulad ng isang punong, Siya man ang may likha,

ang tao ang kailangang mag-aruga, mag-alaga.

nagmula man ito sa sulyap o titig,

sa alindog man ng tula, o sa awiting himig;

tinanim ng Maykapal, tao ang nagdilig,

umusbong na ani'y wagas na pag-ibig.